Ururka ay ku mideysan yihiin dhakhaatiirta wadanka ee KMPDU ayaa sheegay in xubnaha ka tirsan aynan ku dhaqaaqi doonin shaqo joojin horay ay uga hanjabeen.
Tani ayaa timid ka dib wada hadallo dhex maray ururkan , golaha barasaabyada wadanka ee CoG iyo wasaaradda caafimaadka dalka.
Xoghayaha guud ee KMPDU Dr. Davji Atellah ayaa hoosta ka xarriiqay in kastoo aan heshiis kama dambeys ah la gaarin haddana inay hakiyeen qorshahoodi hore ee ahaa inay bishan guda galaan shaqo joojin qaran.
Dr. Atellah ayaa xusay inay fursad kale oo wada hadal ah siinayaan dowladda maadaama sida uu hadalka u dhigay maamulka madaxweyne William Ruto uu muujiyay rabitaan ah in la xalliyo tabashooyinka howlwadeennada caafimaadka.
Shirka ayaa waxaa ka qayb galay xoghayaha guud ee KMPDU Dr. Atellah, Wasiiradda caafimaadka Susan Wafula Nakhumicha,Guddoomiyaha guddiga arrimaha caafimaadka ee golaha CoG ahna barasaabka ismaamulka Tharaka Nithi Muthomi Njuki iyo dhigiisa arrimaha shaqaalaha sidoo kalena ah guddoomiyaha Nairobi Johnson Sakaja .
Dhakhaatiirta ayaa dalbanaya in si buuxda loo dhaqangeliyo heshiis ku saleysnaa gorgortan dhanka mushaar kordhinta ah oo la gaaray sanadkii 2017-kii.
Mas’uuliyiinta ururka dhakhaatiirtu, golaha barasaabyada iyo wasaaradda caafimaadka ee dalka ayaa isku afgartay in tabashooyinka jira xal laga gaaro 5-ta bisha labaad ee sanadkan.
We thank all stakeholders involved for the engagement and progressive discussions and we look forward to seamless action on the resolutions. pic.twitter.com/ZDRZTJpTyt
— KMPDU (@kmpdu) January 5, 2023
