Adeegga qaran ee booliiska ee NPS ayaa xaqiijiyay in saaka shil u dhexeyay labo ka mid ah baabuurta xamuulka qaada uu ka dhacay waddada xiriirisa magaalooyinka Maai Mahiu iyo Naivasha ee ismaamulka Nakuru.
Labada gawaari ayaa ka dib markii ay isku dhaceen waddada ka baxay ugu dambeyna uu dab ka kacay.
NPS ayaa laga soo xigtay in saraakiisha ka howlgalo saldhigga booliiska ee Maai Mahiu ay falcelin degdeg ah sameeyeen iyagoo halkaasi ka soo qaaday dhaawacyo hadda lagu daaweynaya isbitaalka deegaanka Naivasha .
Saraakiisha ammaanka ayaa dhammaan wadayaasha baabuurta iyo dadweynaha ku boorriyay inay muujiyaan mas’uuliyad shakhsiyadeed oo ay aad u taxadaraan gaar ahaan xilli fasaxeedka.
Darawaliinta ayaa laga codsaday inay u hoggaansamaan xeerarka gaadiidka oo aynan baabuurta u kaxeyn si xowli ah.
Shilkan ayaa ku soo beegmaya saacado ka dib markii 8 qof ay ku dhinteen mid kale oo xalay fiidkii laga soo tabiyay waddada wayn ee u dhexeysa magaalooyinka Nakuru iyo Eldoret.
20 qof oo dheeraad ah ayaa ku dhaawacmay shilka ka dib markii ay isku dhaceen gaadiidka dadweynaha ee loo yaqaano mataatuuda iyo gaari xamuul oo marayay buundada Ngata.
