Maamulka isgaarsiinta wadanka ee Communication Authority ayaa bayaan uu soo saaray shaaca uga qaaday in shirkadaha isgaarsiinta ee kala ah Safaricom, Airtel iyo Telkom ay haystaan labo bilood oo dheeraad ah oo ay ku xaqiijinayaan inay boqolkiiba boqol u hoggaansamaan howsha diiwaangelinta.
Maamulka ayaa cadeeyay in tani aynan micnaheedu ahayn in la kordhiyay muddadii horay loogu qaybtay kenyaanka ee ku ekeyd saqdii dhexe ee 15-kii bishan Oktoobar.
Waxaa uu hoosta ka xarriiqay in tani ay tahay fursad dheeraad oo ay shirkadaha isgaarsiinta tallaabooyin uga qaadayaan macaamiishooda aan weli cusbooneysiin macluumaadkii ay isku diiwaangeliyeen.
Marka ay muddadan dhammaato ka dib,CA ayaa la filaya inay sameyso baaritaan dabagal ah waxaana shirkaddii aan sidan sameyn laga qaadaya tallaabo sharciyeed oo ay ka mid tahay in la saaro ganaax ah boqolkiiba 0.5 ee dhaqaalaha sanadkii u soo xaroodo.
Maamulka isgaarsiinta wadanka waxaa uu sheegay in siddeedii bilood ee la soo dhaafay heerka u hoggaansanka barnaamijkan ee shirkadda Safaricom oo horay ahaa boqolkiiba 52 uu gaaray 93 halka Airtel ay noqotay boqolkiiba 42 ilaa 81.2.
Telekom weli dib u eegis ayaa lagu hayaa wuxuuna maamulka xusay inuu faahfaahinta dib ka soo bandhigi doono.
15-kii bishii Afaraad ee sanadkan ayay ahayd markii Communication Authority ay muddo 6 bilood ah ku kordhisay xilli horay loo shaaciyay si shirkadaha iyo macaamiishooda ay si buuxda uga soo baxaan shuruudaha looga baahan yahay.
Agaasimaha guud ee maamulka isgaarsiinta ee CA, Ezra Chiloba ayaa laga soo xigtay in tallaabooyinka ka dhanka ah macaamiisha ee u bannaan shirkadaha ay ka mid tahay in qofka aan diiwaangashanayn si tartiib ah loogu diido adeegga ugu dambeyna nambarka taleefoonkiisa gacanta laga dhigo mid hawada laga saaray oo aan shaqeynayn.
Chiloba ayaa intaasi ku daray in tallaabooyinkan ay saameyn doonaan wicitaanada, farriimaha la diro , daatada iyo adeegyada bangiyeed ee taleefoonnada.
Ilaa Sabtidii waxaa gudaha wadanka laga diiwaangeliyay in ka badan 40 milyan oo ah leemanka taleefoonada gacanta.
Tani ayaa tirada nambarrada ilaa iyo hadda u diiwaangashan shirkadaha isgaarsiinta ee wadanka ka dhigaysa boqolkiiba 80.
Maamulka Isgaarsiinta ayaa sheegay in ujeeddada arrintan laga leeyahay ay tahay in la badbaadiyo macaamiisha isticmaala adeegyada isgaarsiineed iyo in la xoojiyo ku kalsoonaanta adeegsiga nidaamyada warfaafinta, isgaarsiinta iyo tiknolojiyadda ee ICT-da.
Ezra Chiloba waxaa uu kenyaanka uga digay inay aad uga taxadaraan dokumeentiyadooda shakhsiyadeed si dad lagu tilmaamay dhagar-qabayaal aynan leemanka u diiwaangelin si ay ugu adeegsan howlo sharci darro ah.
Waxaa uu tusaale u soo qaatay inay jiraan qaar ka mid ah muwaadiniinta dalka oo la daala dhacaya inay bixiyaan lacagaha amaahda ee lagu qaato qaabka dijitaalka ah oo lagu helay xogahooda .
Ezra Chiloba, agaasimaha guud ee maamulka isgaarsiinta wadanka waxaa uu wacad ku maray in nambar kasta oo aan diiwaangashanayn la xiraya iyadoo aan la eegayn cidda leh sidoo kalena shirkadda lagula xisaabtamaya.
News Update: Press Statement on SIM Card Registration@CADirectorGen @ezraCHILOBA @GilbertKibe @ntvkenya @KTNNewsKE @K24Tv @BreakingNewsKE @TheStarBreaking @PeopleDailyKe @KBCChannel1 @citizentvkenya @tv47ke @dx5ve @MoICTKenya @NationAfrica @StandardKenya pic.twitter.com/CgxxBEovdB
— Communications Authority of Kenya (CA) (@CA_Kenya) October 17, 2022
