Wasiirka Wasaaradda Arrimaha gudaha Soomaaliya Axmad Macallin Fiqi ayaa sheegay in dowladda Soomaaliya ay mashaariicda horumarineyd ay ka fulineyso goobaha dadka deggan ay iska xoreeyeen ururka Al-Shabaab ee ku yaalla Gobollada wadankaasi.
Waxaa uu sheegay in Al-Shabaab ay dileen dadkii hoggaanka iyo hal doorka u ahaa dadka ku nool Gobolka Hiiraan, hayeeshee hadda ay haystaan fursad ay ugu aargudaan mas’uliyiiniitii ay ka dileen Ururka Al-Shabaab.
Wasiir Fiqi ayaa intaasi ku daray in bulshada ku nool Gobolka Hiiraan & guud ahaan Soomaaliya looga baahan yahay inay tartan u galaan sidii dagaal loogu qaadi lahaa Ururka Al-Shabaab, islamarkaana dadkii deegaannadooda ka saara dowladda Soomaaliya ay ka bilaabi doonto adeegyada caafimaadka iyo wixii kale oo ay u baahan yihiin.
Hadalka wasiirka ayaa ku soo aadaya xilli deegaanno iyo degmooyin ka tirsan gobolka Hiiraan ay ka socdaan howlgallo ka dhan ah ururka Al-Shabaab, kaas oo ay ka qayb qaadanayaan ciidamo deegaanka ah oo is abaabulay, kuwaas oo garab ka helaya Ciidamada dowladda Soomaaliya.
