Hoggaamiyaha aqlabiyadda golaha hoose ee ismaamulka Nairobi Cabdi Guyo ayaa sheegay in toddobaadka soo socdo uu wakiillada hor geyn doono mooshin uu ku doonayo in senatarkii dhawaan geeriyooday ee ismaamulka Garissa Maxamad Yuusuf Xaaji loogu magacdaro mid ka mid ah waddooyinka ku yaalla caasimadda dalka.
Waxaa uu hoosta ka xarriiqay in hadii tani lagu waafaqo ay noqon doonto tallaabo lagu xusuusto siyaasigii sida weyn uga soo shaqeeyay arrimaha nabadda.
Mr .Guyo ayaa sheegay in Alle ha u naxariistee senatarkii Garissa Maxamad Yuusuf Xaaji uu kaalin weyn ka soo qaatay arrimaha BBI ee isbeddellada lagu doonayo ay ka mid tahay sare u qaadidda midnimada shacabka.
Hoggaamiyaha aqlabiyadda golaha hoose ee Nairobi Cabdi Guyo ayaa carrabka ku adkeeyay in marnaba doorkii senatarka ee BBI aan la hilmaami karin sidaas awgeedna uu mudan yahay in waddo loogu magacdaro.
Tani ayaa imaanaysa iyadoo xildhibaanka deegaanka Garissa Township Aadan Barre Ducaale uu sheegay in soo jeedintan laga habboon yahay.
