Waxaa si rasmi ah duulimaadyadooda dib u billaabay shirkadaha diyaaradaha Turkish Airline, Ethiopian Airways iyo Uganda Airline kuwaasoo hakiyay duulimaadkooda Garoonka Aadan Cadde maalin ka hor ee caasimadda dalka Soomaaliya ee Muqdisho.
Sababaha ay duulmaadyada u hakiyeen shirkadaha diyaaradaha ayaa waxaa ay ku sheegeen arrimo dhanka amniga ah, ka dib markii shaqaaqooyin u dhaxeeyay Ciidamada dowladda iyo kuwa ay wateen Midowga Musharixiinta ay ka dhaceen Magaalada Muqdisho.
Wasiirka Gaadiidka ee DFS Cabdullaahi Salaad Oomaar oo ku suganaa Garoonka yaa sheeggay in Maanta ay dib u bilaawdeen duulimaadyada Caalamiga ah, isla markaana ay si caadi ah u Shaqeeynayaan.
Sidoo kale waxaa si caadi ah u socda Duulimaadyada ay Muqdisho ku imaanayaan diyaaradaha Djibouti Air, Hala Airlines, Daalo iyo diyaaradaha hay’adaha caalamiga ah sida WFP, UN.
Shaqaaqooyinkii ka dhacay Magaalada Muqdisho maalin ka hor ayaa waxaa ay saameyn ku yeesheen shaqada Garoonka diyaaradaha Aadan-Cadde ee Magaalada Muqdisho ka dib markii uu ku dhacay mid kamid ah hubkii labada dhinac ay isku ridayeen.
