Taliyaha guud ee ciidanka booliiska dalka Mr. Douglas Kanja ayaa socdaal aan horay loo sii shaacin ku tagay saldhigga booliiska ee Mweiga oo ku yaalla deegaanka Galbeedka Kieni ee ismaamulka Nyeri .
Kanja ayaa intii uu halkaasi ku sugnaa kormeeray qaybaha kala duwan ee saldhigga si uu u ogaado dhinacyada u baahan in la sii wanaajiyo.
Waxaa uu saraakiisha booliiska ku bogaadiyay sida ay uga go’an tahay u adeegidda shacabka.
Waxaa uu kula taliyay in aynan marnaba ka gaabin la dagaallanka maandooriyaha ay khamradu ka mid tahay.
Sidoo kale , waxaa uu faray in ay sare u qaadaan xirfadahooda dhanka warfaafinta, isgaarsiinta iyo tiknolojiyadda ee (ICT) oo ay u diyaar garoobaan casriyeynta howlaha iyo waxqabadka booliiska.
Taliyaha guud ee booliiska dalka Mr. Douglas Kanja ayaa sheegay in tani looga gol-leeyahay wanaajinta adeegyada bulshada iyo ciribtirka musuqmaasuqa .
Waxaa uu sidoo kale ciidamada kala hadlay daryeelkooda, caafimaadka maskaxeed, qiyamka qoysaska iyo maaliyadda.
Waxaa socdaalka ku wehelinayay mas’uuliyiin sare oo uu ka mid yahay ku xigeenkiisa Mr. Gilbert Masengeli.
Mr. Douglas Kanja ayaa horay u soo maray saldhigyada booliiska ee Kiamariga iyo Karatina ee ismaamulka Nyeri isagoo saraakiisha kula taliyay in ay ilaaliyaan habdhaqanka iyo daahfurnaanta sidoo kalena ay xiriir wanaagsan la yeeshaan bulshada.
