Meydka sargaalkii geeriyooday ee Samuel Tompoi Kaetuai oo la dilay xili uu howlo nabad ilaalineed u joogay dalka Haiti ayaa soo gaaray magaalada Nairobi fiidnimadii xalay.
Ku xigeenka Taliyaha Guud ee booliiska Gilbert Masengeli ayaa hogaaminaya koox askar ah si ay u guddoomaan meydka sarkaalka la dilay.
Sidoo kale waxaa goobjoog ka ahaa Senatarka la magacaabay Peris Tobiko, xubnaha qoyska iyo saaxiibada oo uu hoggaaminayay aabbihii sarkaalka dhintay, Salaash Kaetuai.
Meydka ayaa loo gudbiyay goobta meydka ee Chiromo intii ay ka soo gabagaboobeyso qaban qaabada aaska.
Maalmaha soo socda ayaa la filayaa in la shaaciyo xilliga la aasayo sarkaalkan.
Samuel Kaetuai ayaa waxaa dilay kooxo hubeysan xilli uu ka qeyb galayay howlgalka nabad ilaalinta ee Haiti.
Howlgalka Taageerada Amniga ee Qaramada Midoobay ayaa dhimashadiisa ku xaqiijiyay barraha bulshada ee X dabayaaqadii bishii hore ee Febraayo, iyagoo sheegay in sarkaal Kenyaan ah uu u dhintay dhaawac ka soo gaaray howlgal.
Adeegga Qaran ee Booliiska ayaa markii dambe qirtay dilka sarkaalka, isagoo ku warramay in uu rasaas kala kulmay xubno looga shakisan yahay inay yihiin burcadda Haiti.
