Garabka mucaaradka ugu wayn dalka Benin ayaa ku andacooday in la iibsaday codadka shacabka sidoo kalena wax isdabamarin badan lagu sameeyay doorashadii dhacday Axadii, taasoo asxaabta madaxweynaha Benin u ogolaatay inay ku guulaystaan kuraasta ugu badan ee baarlamaanka.
Guddiga doorashooyinka Benin ayaa galinkii danbe ee Arbacada ku dhawaaqay natiijada horudhaca ah ee doorashadii baarlamaaniga.
Sida guddiga doorashada laga soo xigtay mucaaradka ugu wayn ee Dimuqraadiga ayaa helay 28 kursi halka xisbiyada Jamhuuriga BR iyo Progressive Union for Renewal (UP-R) ee xulufada la ah madaxweyne Patrice Talon ay wada jir u heleen 81 Kursi.
Hoggaamiyaha xisbiga Dimuqraadiga, oo ka mid ah 3-da xisbi ee sheeganaya inay mucaaradka ka tirsan yihiin ayaa ku dhawaaqay in doorashada wax isdabamarin lagu sameeyay.
8-dii bishan ayaa ilaa 7 xisbi siyaasadeed oo ay ku jiraan saddex xulufo la ah mucaaradka waxaa loo ogolaaday inay ka qaybgalaan doorashada ka dib 4 sano oo laga mamnuucay.
Natiijooyinka kama dambayska ah ee 109 kursi ee baarlamaanka dalka Benin ayaa la filayaa in lagu dhawaaqo maanta, ka dib codbixintii si nabad ah oo waafaqsan shuruucda u dhacday sida ay sheegeen kormeereyaasha doorashada ee ka socday dallada dhaqaalaha dalalka galbeedka Africa ee ECOWAS.
Dimuqraadiyiinta waxay dhankooda ku dhawaaqeen inay racfaan ka qaadan doonaan maxkamadda dastuuriga ah.
Qiyaastii 6. 6 milyan oo shacabka dalka Benin ka mid ah ayaa loogu baaqay inay codeeyaan maalinkii Axadda ee ay doorashada baarlamaanka dhacaysay, balse dadka u soo baxay doorashada ayaa la sheegay inay tiradooda yareyd.
Xisbiga Dimuqraadiga ayaa rajeynayay inuu helo kuraas loogu diyaar garoobayo doorashada madaxtinimada ee sanadkan 2026-ka markaas oo musharrixiinta ay u baahan doonaan taageerrada xildhibaan si loo diiwaangeliyo balse rajadaas ayaa ka muuqan natiijada horudhaca ah taasoo keentay qaylada mucaaradka.
