Booliska dalka Turkiga ayaa 22 qof u xiray qaraxii shalay galab ka dhacay bartamaha magaalada Istanbul oo ay ku dhinteen ugu yaraan 8 qof halka 81 kalena ay ku dhaawacmeen.
Wasiirka arrimaha gudaha ee Turkiga Suleyman Soylu ayaa u sheegay maanta wariyeyaasha in tuhmanayaasha uu ku jiro qofkii waddada dhigay bamkii qaraxa dhaliyay.
Waxaa uu sheegay in weerarkan ay ka dambeeyeen maleeshiyaadka kurdiyiinta ee PKK.
Ilaa hadda ma jirto cid sheegatay mas’uuliyadda qaraxa.
Falkan ayaa laga soo tabiyay waddada caanka ah ee Istiklal Avenue ee magaalada Istanbul.
Waxaa saameynta ka dhalatay qaraxa ka hadlay si wayna u cambaareeyay madaxweynaha dalka Turkiga Recep Tayyip Erdogan.
Weerarka ayuu ku tilmaamay mid wuxushnimo ah oo u muuqdo mid argagixiso.
Erdogan ayaa ballanqaaday in cidii ka dambeysay qaraxa la ciqaabi doono.
