Madaxweynaha dalka Mr. Uhuru Kenyatta ayaa tacsi u diray qoyska , ehellada , asxaabta iyo shacabka deegaanka Juja ee ismaamulka Kiambu ka dib geeridii ku timid xildhibaan Francis Munyua Waititu oo baarlamaanka ku matalayay.
Geerida mudanaha waxaa warbaahinta u xaqiijiyay xubno ka mid ah qoyskiisa.
Wararka ayaa intaa ku daraya in xildhibaanka uu xalay ku geeriyooday isbitaal ku yaalla magaalada Nairobi ka dib markii uu haleelay nooca cudurka kansarka ee saameeya maskaxda.
Mr. Kenyatta ayaa farriin uu soo saaray ku sheegay in Francis Waititu uu ahaa mas’uul si daacadnimo ay ku dheehan tahay ugu adeegayay dadkiisa.
Hoggaamiyaha dalka ayaa sheegay in xildhibaanka uu ahaa qof lagu kalsoonaan karo oo ay ka go’anayd ka shaqeynta danaha muwaadiniinta uu matalayay.
