Taliyaha Guud ee Booliiska, Douglas Kanja, ayaa Arbacadii daah furay wajiga labaad ee barnaamijka tababarka dhijitaalka ah ee Adeegga Qaran ee Booliiska (NPS), kaas oo lagu xoojinayo tababarka saraakiisha iyada oo loo marayo barashada dhijitaalka ah taasoo qayb ka ah dib u habeynta socota ee adeegga booliiska.
Daahfurka ayaa ka dhacay Akadeemiyadda Qaran ee Baaritaanka Dambiyada, waxaana ka qayb galay saraakiil ka socda guud ahaan adeegga iyo hay’adaha horumarineed ee taageeray fulinta barnaamijka. NPS ayaa sheegtay in barnaamijkan dhijitaalka ah uu yahay talaabo kale oo lagu casriyeynayo adeegga booliiska, lagu dhiirrigelinayo horumarinta xirfadeed ee joogtada ah, isla markaana lagu xoojinayo awoodda hay’adda.
Barnaamijka ayaa waxaa taageeray hay’ado caalami ah oo ay ka mid yihiin Midowga Yurub oo ka qayb qaatay barnaamijka PLEAD, iyo Xafiiska Qaramada Midoobay ee Dambiyada iyo Maandooriyaha (UNODC), kuwaas oo la kaashaday adeegga booliiska horumarinta madal tababarka dhijitaalka ah. Wajigii hore ee barnaamijka ayaa la bilaabay 2020-kii intii uu socday caabuqa COVID-19, markii tababarada fool ka fool la hakiyay, taasoo keentay in adeegga booliiska uu qaato aaladaha dhijitaalka ah si loo sii wado tababarka iyo dhisida awooda saraakiisha.
Wajiga labaad ee barnaamijka ayaa balaarinaya manhajka, isagoo ku daraya afar module oo cusub oo diiradda saaraya: baaritaanka dambiyada, maareynta isbeddelka, dhaawacyada shaqada la xiriira, iyo xadgudubyada galmada ee carruurta ee internetka. Kanja ayaa sheegay in madashan dhijitaalka ah ay muujinayso sida ay adeegga booliiska uga go’an tahay isticmaalka tiknoolajiyada si loo horumariyo xirfadda, hufnaanta, iyo isla xisaabtanka.
Saraakiisha ayaa sidoo kale xusay in barnaamijka uu siin doono saraakiisha aqoon iyo xirfado casri ah oo looga baahan yahay in looga jawaabo dambiyo sii adkaanaya, gaar ahaan kuwa ka dhasha meelaha dhijitaalka ah. Hay’adaha caalamiga ah ee taageeray barnaamijka ayaa lagu amaanay doorkooda muhiimka ah ee horumarinta awooda hay’adda, xoojinta dib u habeynta, iyo hagaajinta Adeegga Qaran ee Booliiska.
