Laba qof ayaa ku dhintay 11 kalena way ku dhaawacmeen ka dib markii gaari xamuul ah uu si fool ka fool ah ugu dhacay gaari matatu ah agagaarka Kapmusa oo ku teedsan wadada weyn ee Bomet-Kisii, sida ay booliisku sheegeen.
Taliyaha Taraafikada ee ismaamulka Bomet, Daniel Ololngojine, ayaa sheegay in gaariga xamuulka ah, oo ka soo safrayay Kaplong una socday magaalada Bomet, uu ka baxay wadada ka hor inta uusan ku dhicin gaari matatu ah oo ay leedahay Shirkadda Quarser Shuttle.
Boolisku waxay sheegeen in darawalkii gaariga matatuga iyo hal rakaab ah ay isla goobta ku dhinteen.
Shilka ka dib, toddobo rakaab oo dhaawac ah ayaa loola cararay Isbitaalka Kaplong Mission, halka afar kale oo xaalad halis ah ku jira loo gudbiyay Isbitaalka Tenwek.
Kuwa dhaawacmay waxaa ka mid ah labo jir iyo siddeed jir oo jab soo gaaray, waxaana la sheegay inay xaaladdoodu deggan tahay.
Booliiska ayaa sheegay in darawalkii gaariga xamuulka ah uu goobta ka baxsaday, lana raadinayo.
Meydadka ayaa loo qaaday qolka meydadka ee Isbitaalka Longisa, halka burburka gaarigana loo jiiday Saldhigga Booliska ee Bomet si loo baaro iyadoo baaritaannadu ay socdaan.
