Kenya iyo Midowga Yurub ayaa Khamiistii kala saxiixday afar heshiis oo maalgelin oo waaweyn oo qiimahoodu dhan yahay 4.8 bilyan oo shillinka dalka ah si loo taageero kala guurka cagaaran ee dalka, loona xoojiyo adkeysiga cimilada, loona dedejiyo u gudubka dhaqaalaha wareegsan.
Heshiisyada, oo si rasmi ah loogu saxiixay xaruunta Alliance Française ee magaalada Nairobi ayaa waxaa ay ujeedadoodu tahay in la xoojiyo awoodda Kenya ee la dagaallanka isbeddelka cimilada, dib u soo celinta muuqaalka dhulka ee xumaaday, ilaalinta kala duwanaanshaha noolaha, iyo in la ballaariyo fursadaha dhaqaale ee cagaaran ee bulshooyinka ku nool gobollada cimilada u nugul.
Safiirka Midowga Yurub ee Kenya iyo Wakiilka Joogtada ah ee hay’adaha Qaramada Midoobay u qaabilsan deegaanka ee UNEP iyo tan dejinta aadanaha ee UN-Habitat, Henriette Geiger, ayaa sheegtay in ballanqaadyada cusub ay muujinayaan isku xirnaanta dhow ee u dhaxaysa Kenya iyo Midowga Yurub ee mudnaanta deegaanka.
Waxaa ay iftiimisay caqabadaha gaarka ah ee Kenya ee dhulalka qalalan iyo kuwa nus-aroorka ah (ASALs), saxaraha sii kordhaya, iyo cadaadiska saaran duurjoogta iyo hab nololeedka maxalliga ah.
Saxeexa ayaa ka soo hor maray Golaha Deegaanka ee Qaramada Midoobay (UNEA-7), oo loo qorsheeyay horraanta Diseembar ee sanadkan kaasoo la filaayo inuu ka dhaco Nairobi, halkaas oo la filayo in Kenya ay ka ciyaarto door hoggaamineed oo dhexe oo ku saabsan qaabeynta siyaasadaha deegaanka ee caalamiga ah.
Heshiisyada ayaa waxaa ay calaamad u yihiin sii qoto dheeraanta iskaashiga Midowga Yurub iyo Kenya, taasoo dejinaysa marxaladda UNEA-7 iyo hoggaanka sii socda ee Kenya ee maamulka deegaanka adduunka.
