Hoggaamiyaha xisbiga PLP Martha Karua ayaa dhaleeceeysay kororka weerarada shakhsiga ah ee siyaasiyiinta, iyada oo ka digtay in dhaqankaas uu dhaawacayo sumcadda xafiiska dadweynaha. Waxaa ay ugu baaqday hoggaamiyeyaasha inay diiradda saaraan doodaha qotada dheer iyo arrimaha qaranka.
Karua ayaa sidoo kale su’aalo ka keentay faragelinta dowladda ee hay’adaha gaarka loo leeyahay, iyada oo tilmaantay in tallaabooyinka noocaas ah aysan haysan saldhig sharci oo cad, iyadoo arrintan ay la xiriirto dadaallada Madaxweyne William Ruto uu ku doonayo inuu gacanta ku dhigo isbitaalka Nairobi.
Martha Karua ayaa sheegtay in maamulka isbitaalka uu la kulmay khaladaad maamul oo culus, oo ay ka mid yihiin musuqmaasuq, xatooyo lacageed, iyo ku lug lahaanshaha dhul qaadasho. Waxaa ay su’aashay sababta dowladda aysan marka hore u wajaheyn arrimahaas ka hor inta aysan faragelin ku sameyn hay’ad gaar ah.
Dhibaatooyinka siyaasadeed ayaa kasii dartay markii Madaxweyne Ruto iyo ku xigeenkiisii hore Rigathi Gachagua ay isku sii tuureen hadalo shakhsi ah, taas oo dhalisay feejignaan ku saabsan hoos u dhaca sharafta hoggaaminta. Musharixiinta kale sida Fred Matiang’i ayaa ugu baaqay madaxda inay ixtiraamaan xafiiska madaxweyne iyo hoggaaminta, iyadoo laga digay in siyaasiyiinta ay ka fogaadaan aflagaado iyo weerar shakhsiyeed.
