In ka badan 120,000 oo qof oo ka kala yimid 19 tuulo oo ku yaalla deegaanka Manzini ee ismaamulka Uasin Gishu, ayaa ka dalbaday Baarlamaanka in la dedejiyo bixinta waraaqaha lahaanshaha dhulka. Waxaa ay sheegeen in dib u dhacyo muddo dheer socday ay caqabad ku noqdeen horumarkooda isla markaana ay u nugleeyeen khiyaanooyin la xiriira dhulka.
Dadka deegaanka ayaa codsigooda u gudbiyay guddiga Baarlamaanka ee u qaabilsan deegaanka, kaymaha iyo macdanta, ka dib kulan ka dhacay deegaanka Manzini. Waxaa ay xuseen in ay dhulkan ku noolaayeen in ka badan 30 sano tan iyo markii dowladda ay u qoondeysay, balse weli aysan helin waraaqaha lahaanshaha.
Shacabka ayaa tilmaamay in helitaanka waraaqahaas uu u sahli doono inay helaan adeegyo maaliyadeed iyo fursado horumarineed. Waxaa ay sidoo kale xuseen in dad badan oo deegaanka ka mid ah ay geeriyoodeen iyagoo sugaya xaqiijinta lahaanshaha dhulkooda.
Guddiga Baarlamaanka ayaa ballanqaaday in arrintan si degdeg ah loo eegi doono, iyagoo sheegay in ay diyaarin doonaan warbixin rasmi ah oo la horgeyn doono Golaha Shacabka si go’aan looga gaaro dhibaatadan daba dheeraatay.
