Hay’adda Laanqeyrta Cas ee Kenya ayaa qiratay in fatahaadihii xooganaa ee dhacay Jimcihii ay ka yaabsadeen kooxaha gurmadka degdegga ah, iyadoo tirada dadka ku dhintay roobabka culus ay gaartay 28 qof. Xoghayaha guud ee hay’adda, Axmed Idiris, ayaa sheegay in saameynta fatahaaduhu ay ka weynayd sidii la filayay, taasoo culays badan saartay kooxaha samatabbixinta ee ka howlgala meelaha ay dhibaatadu ka dhacday. Waxaa uu sidoo kale tilmaamay in waddooyin badan oo biyo fadhiisteen ay adkeeyeen dhaqdhaqaaqa kooxaha gurmadka, gaar ahaan gudaha caasimadda.
Hay’adda ayaa sheegtay inay dib u eegis ku sameysay habka ay uga jawaabto musiibooyinka, si loo kordhiyo diyaar garowga haddii roobabka ay sii socdaan. Saddex kooxood oo gurmad degdeg ah ayaa hadda heegan ku jira gudaha Nairobi, kuwaas oo wata doonyo samatabbixin iyo shaqaale si gaar ah u tababaran. Hay’adda ayaa sheegtay inay qaadday tallaabooyin lagu hubinayo in gurmadka uu si degdeg ah u gaaro dadka ay fatahaaduhu saameeyaan.
Qorshaha gurmadka musiibooyinka ee hay’adda ayaa lagu saleeyaa saadaasha cimilada iyo qorshe hore oo lagu sii diyaargaroobo. Hay’adda ayaa horey u gaarsiisay agab iyo qalab meelaha laga filayo fatahaadaha, waxaa ayna sii diyaarisay gargaar muhiim ah sida agabka hoyga ku meelgaarka ah, qalabka jikada iyo sahay kale oo loogu talagalay dadka barakacay.
Hay’adda ayaa hadda si dhow ula socotaa ugu yaraan 11 dowlad deegaan oo ay fatahaado saameeyeen ama halis ugu jira, iyadoo heerarka biyaha ee webiyada iyo harooyinka ay sare u kacayaan. Dowladda ayaa sidoo kale sameysay koox isku dhaf ah oo ka kooban hay’ado kala duwan si ay u isku dubbaridaan howlaha samatabbixinta iyo gargaarka, halka waaxda saadaasha hawaduna ay ka digtay in roobabka ay sii xoogeysan doonaan ilaa Isniinta toddobaadka soo socda, iyadoo meelo badan oo dalka ka mid ah laga filayo roobab culus.
