Afar gabdhood oo dhigta dugsi sare kana soo jeeda deegaanka Likoni ee ismaamulka Mombasa, kuwaas oo la waayay horraantii toddobaadkan, ayaa laga helay dalka Tanzania. Booliiska ayaa bilaabay baaritaan ku saabsan sida ay carruurtan uga gudbeen xadka iyada oo aan la dareemin.
Gabdhaha oo dhiganayay fasalka 9-aad ee dugsiga Shika Adabu ayaa la waayay Isniintii ka dib markii ay guryahooda ka baxeen iyagoo u socday dugsi, balse aan iskuulka gaarin. Maqnaanshahooda ayaa la ogaaday markii ay galabtii ku soo laaban waayeen xaafadahooda, taasoo keentay in qoysaskooda ay bilaabaan raadraac degdeg ah.
Booliiska ayaa sheegay in gabdhaha laga helay Tanzania Arbacadii, halkaas oo la rumeysan yahay inay u tageen raadinta shaqo. Haatan waxaa ay ku jiraan gacanta mas’uuliyiinta, iyadoo la diyaarinayo sidii dib loogu soo celin lahaa dalka. Waalidiinta ayaa sheegay in arrintan ay u muuqato mid horay loo qorsheeyay, maadaama gabdhaha ay qaateen dhar iyo agabkoodii gaarka ahaa iyagoo iska dhigaya inay dugsi u socdaan.
Wararka ayaa tilmaamaya in gabdhaha la qabtay ka dib markii qof deegaanka ah uu ka shakiyay lahjadooda isla markaana uu wargeliyay odayaasha deegaanka. Waxaa sidoo kale la tuhunsan yahay inay ka gudbeen dhinaca dowlad deegaanka Kwale. Dadka deegaanka ayaa walaac ka muujiyay in ay jiraan dad dhallinyarada dugsiyada ku jira ku khiyaaneeya ballanqaadyo shaqo oo dibadda ah.
