Maamulka Nidaaminta Tamarta iyo Shidaalka (EPRA) ayaa beenisay warar si weyn ugu faafay baraha bulshada oo sheegaya in la kordhiyay qiimaha shidaalka. Bayaan ay soo saartay Arbacada maanta ah ayay hay’adda ku sheegtay in qoraal wareegaya oo u eg mid rasmi ah uu yahay mid been abuur ah, isla markaana uusan ka tarjumayn habraacyada sharciga ah ee lagu go’aamiyo qiimaha shidaalka.
EPRA ayaa caddeysay in isbeddel kasta oo ku yimaada qiimaha shidaalka uu raaco nidaam sharci iyo xeerar qeexan, iyadoo ku saleysan Qodobka 101(y) ee Xeerka Shidaalka 2019 iyo Ogeysiis Sharci Lr. 192 ee 2022. Sida ku cad habraacaas, hay’adda ayaa shaacisaa jadwalka qiimaha shidaalka ee bisha xigta 14-ka ee bil kasta, taas oo ka hor imaanaysa sheegashada ku jirta qoraalka been abuurka ah ee tilmaamaya kordhin degdeg ah.
Arrintan ayaa ku soo beegmaysa xilli madaxweynaha uu ka hadlay saameynta colaadaha Bariga Dhexe ku leeyihiin suuqyada caalamiga ah iyo silsiladaha sahayda. Waxaa uu sheegay in dowladda ay qaadday tallaabooyin lagu sugayo helitaanka shidaalka iyo yareynta saameynta dhaqaale, isagoo xusay in heshiiska dowladaha ee soo dejinta shidaalka uu door muhiim ah ka ciyaaray xasilinta qiimaha iyo hubinta joogteynta sahayda dalka.
