Dowladdu waxay ku amartay dhammaan deegaanada hoose ee dalka inay sameeyaan miisaska macluumaadka dadweynaha, gurmadka degdegga ah iyo xarumaha gargaarka maadaama roobabka culus ay sii wadaan inay ku dhuftaan gobollo badan oo Kenya ah.
Amarkan ayaa yimid iyadoo ay jiraan digniino ka soo baxay Waaxda Saadaasha Hawada ee Kenya oo sheegaya in roobab xooggan ay ka da’i doonaan inta badan qaybaha dalka, taasoo kor u qaadaysa khatarta fatahaadaha, iyo wabiyada oo biyo badan keena.
War-saxaafadeed uu soo saaray wasiirka Adeegga Dadweynaha iyo barnaamijyada gaarka ah Geoffrey Ruku ayaa lagu sheegay in Wasaaraddu ay isku dubaridayso dadaallada u diyaargarowga masiibooyinka, ka jawaabista iyo soo kabashada inta lagu jiro xaaladda degdegga ah ee cimilada.
Wuxuu sheegay in degmo kasta oo hoose ay tahay inay ka dhisto xarumo degdeg ah oo ku yaal qayb kasta si loo xoojiyo isku-dubaridka loona bixiyo gargaar degdeg ah bulshooyinka ay dhibaatadu saameysey.
Wuxuu sidoo kale faray dhammaan Guddoomiyeyaasha amniga ee ismaamulada inay si dhow ula socdaan xaaladda isla markaana ay si degdeg ah u soo sheegaan tirada qoysaska ku nool deegaannadooda ee u baahan gargaar daadad awgood.
