Allans Ademba oo ka mid ah dadka u olaleeya xuquuqda bulshada ayaa ka hadlay hanjabaado iyo cabsi gelin kaga imaanaya dowladda, ka dib markii la hakiyay qaar ka mid ah akoonnadiisa baraha bulshada. Qoraal uu ku daabacay bartiisa X ayuu ku sheegay in akoonkiisa TikTok-ga, la xannibay saacadihii hore ee xalay.
Ademba ayaa sheegay in tallaabadan ay qayb ka tahay cadaadis uu sheegay in dowladda ay ku hayso, isagoo soo bandhigay xog muujinaysa gaarsiinta uu ku lahaa baraha bulshada, oo ay ku xiran yihiin malaayiin qof. Waxaa uu intaas ku daray in uu ka baqayo badbaadadiisa haddii uu si buuxda u shaaciyo qaababka kale ee cabsi gelinta ee uu la kulmay.
Waxaa uu sidoo kale sheegay in uu hadda adeegsado taleefoon fudud oo aan lahayn internet si uu uga fogaado dabagal suurtagal ah, inkastoo uu xusay in qalabkaasi weli la raadin karo marka uu shidan yahay. Arrintan ayaa kusoo beegmaysa xilli hay’ado xuquuqul insaanka iyo ururo caalami ah ay dowladda ku eedeeyeen adeegsiga kormeer dijitaal ah oo lagu bartilmaameedsado dadka dhaliila xukuumadda madaxweyne Ruto.
Ademba ayaa ah aasaasaha hindisaha “Niko Kadi” oo bilowday bishii Febraayo ee sanadkan, kaas oo dhiirrigelinaya dhallinyarada inay iska diiwaan geliyaan codbixinta ka hor doorashada guud ee 2027.
