Guddiga Qaran ee Xuquuqda Aadanaha ee (KNCHR) ayaa shaaciyay in uu diyaariyay liis ka kooban 1,224 qof oo loo aqoonsaday dhibanayaal xadgudubyo xuquuqda aadanaha ah, kaas oo weli ku jira marxalad xaqiijin ah iyadoo la raacayo shuruudaha u qalmitaanka. Tallaabadan ayaa qayb ka ah dadaallada lagu doonayo in lagu xaqiijiyo caddaalad iyo magdhow la gaarsiiyo dadka ay waxyeelladu gaartay.
Guddiga ayaa sidoo kale sheegay in uu wado dejinta hannaan dhammaystiran oo magdhow ah, kaas oo lagu wajahayo xadgudubyadii hore. Kuwaas ayaa waxaa ka mid ah dilal sharci darro ah, jirdil, afduub, dad si khasab ah loo waayay, tacaddiyo galmo iyo kuwo ku saleysan jinsiga, burbur hantiyeed iyo luminta ilaha nololeed.
Marka la soo gabagabeeyo xaqiijinta liiska, Guddiga ayaa qorsheynaya in uu u gudbiyo madaxweynaha, iyadoo ay la socoto qorshaha guud ee magdhowga. Dhanka kale, Guddiga ayaa sii wada qaadashada cabashooyinka iyo warbixinada muwaadiniinta, isagoo xafiisyadiisa dhexe iyo kuwa gobollada u furi doona dadka xitaa inta lagu jiro maalmaha fasaxa si loo fududeeyo ka qaybgalka.
Guddoomiyaha KNCHR, Claris Ogangah, ayaa muujisay sida ay uga go’an tahay hay’adda hirgelinta caddaaladda, iyadoo ku boorisay dhibanayaasha iyo badbaadayaasha in ay soo gudbiyaan wixii ay la kulmeen. Guddiga ayaa sidoo kale ku baaqay in la sii daayo dhaqaalaha uu Baarlamaanka u qoondeeyay howlaha magdhowga iyo caddaaladda, si loo dardargeliyo dadaalladan muhiimka ah ee heer qaran.
