Tirada dadka ku dhintay daadadka ayaa gaartay 110 iyadoo roobab xooggan ay ka da’ayaan gobollo badan oo dalka ah.
Sida laga soo xigtay Wasaaradda Arrimaha Gudaha, dhibaatada daadadka ayaa hadda ku fiday 30 degmo, iyadoo meelaha cusub ee ay saameeyeen ay ka mid yihiin Kilifi, Bungoma, Nyeri, Kirinyaga, Nyandarua, Kiambu, Uasin Gishu, iyo Mandheera, taasoo muujinaysa xaalad degdeg ah oo bani’aadamnimo oo sii kordheysa.
Nairobi ayaa weli ah gobolka ugu daran ee uu saameeyay roobka, iyadoo tirada ugu badan ee dhimashada ay tahay 37 .
Gobolka Bari ayaa diiwaan geliyay 26 dhimasho ah, Rift Valley 14, Nyanza 11, Gobolka Dhexe 6, Xeebta 5 iyo Galbeedka 2.
Masiibadan ayaa sidoo kale sababtay barokac ballaaran, iyadoo 6,953 qoys ay saameeyeen, taasoo u dhiganta qiyaastii 34,765 qof oo lagu qasbay inay ka cararaan guryahooda sababo la xiriira biyaha oo sii kordhaya iyo burburka kaabayaasha dhaqaalaha.
Qoysas badan oo barakacayaal ah ayaa hadda lagu hayaa hoy ku meel gaar ah iyadoo hay’adaha samafalka iyo dowladaha gobolku ay ku dadaalayaan inay bixiyaan cunto, biyo nadiif ah, iyo gargaar caafimaad.
Kooxaha gurmadka degdegga ah ayaa sidoo kale soo sheegaya in saddex qof ay weli maqan yihiin, iyadoo hawlgallada samatabbixinta ay socdaan inkastoo xaaladaha cimilada oo adag iyo dhul aan la geli karin ay ka jiraan gobollada qaarkood ee ay dhibaatadu saameysey.
Dowladdu waxay sii waddaa inay ku booriso dadka ku nool meelaha ay daadadku u nugul yihiin inay u guuraan dhul sare oo ay u hoggaansamaan digniinta maadaama la filayo in roobabku ay ka da’aan qaybo badan oo dalka ah.
