20.Aug.2012:- Waaxda taraafikada Wadooyinka ee dalka Kenya ayaa qaylo dhaan ka soo saartay tirada aadka u saraysa ee ku dhimatay shilalka wadooyinka sanadkaan.
Abaanduulaha ciidamada taraafikada dalka Benson Kibui ayaa shaaca ka qaaday in 2,000 oo qof ay shilal ka dhacay wadooyink Kenya ay u geeriyoodeen sanadkaan oo kali ah.
Dadkani ayaa inta badan waxay ku dhinteen shilalka gawaarida dadwaynaha oo wadooyinka ka dhaca kuwaasi oo u muuqda inuu sii kordhayo.
Mr Benson ayaa farta ku fiiqay in tiradani ay yartahay marka la barbar dhigo sanadii aanu soo dhaafnay oo tirada shilalka wadooyinka ku dhintay ay ahayd 3,322 ruux.
Abaanduulaha ciidamada taraafikada Wadooyinka dalka Kenya ayaa ku nuuxnuuxsaday in ay rajaynayaan in ay si aad ah hoos ugu dhacaan tirada shilalka ee dalka ka dhaca .
Waxaa sidoo kale si aad ah u saraysa tirada dadka wadooyinka lugaynaya ee ay gawaarida jiirayaan sida ay waaxda taraafikada dalka shegeen.
Benson Kibui Abaanduulaha ciidamada taraafikada dalka ayaa waxuu ku tilmaamay in shilalka inta badan wadooyinka dalka ka dhaca ay ku yimaadaan shuruucda wadooyinka oo la baal maro.
Sikastaba shilalka ka dhaca wadooyinka dalka Kenya ayaa lagu tilmaamay in ay yihiin mid ka mid kuwa caalamka ugu sareeya ayada oo ay dad badan ku naf waayaan .