19.June.2012:- Wasiirka waxbarashada Mutula kilonzo ayaa waxa uu sheegay in dowlada ay bixin doonto 4.8 bilyan shiling oo ah lacagta loogu tala galay waxbarashada bilaashka ah ee Dugsiyada Hoose Dhexe iyo Dugsiyada Sare islamarkaana ay qarashaadkaas Bixinayaan bisha soo socota.
Bayaan uu soo saaray Wasiirka Waxbarashada Mr Mutula Kilonzo ayaa waxa uu sheegay in lacagtani ay ku shubi doonaan Acountiyada Iskuulada islamarka ay ka helaan waaxda kayd haynta dalka.
Mutula ayaa waxa uu sheegay in tilaabadani ay qayb ka tahay heshiis ay wada saxiixdeen waaxda kayd haynta oo balan qaaday in ay bixin doonaan 7 bilyan oo shiling si loogu maal galiyo Tacliinta bilaashka ee dugsiyada hoose dhexe iyo kuwa sare .
Sida ku cad heshiiskani 1.8bilyan oo shiling oo kamid ah lacagtani ayaa waxaa loogu tala galay waxbarashada bilaashka ee dugsiyada hoose dhexe halka 5.15 ay aadi doonto dugsiyada sare.
Balan qaadka wasiirka waxbarashada Mr Mutula Kilonzo ayaa imaanaya xili maamulayaasha dugsiyada hoose dhexe ee dalka ay sheegeen in ay qarka u saaranyihiin in ay ardayda kala diraan lacag la’aan darteed .