30.May.2012:- Dowlada Wadanka Iran ayaa balan qaaday in dalka Kenya ay ka caawin doonto la dagaalanka argagixisada iyo qatarada dalka ka soo wajahaysa kooxaha xag jirka ah .
Balan qaadkani dowlada Iran ayaa qayb ka ahaa heshiisyo badan oo ay wada saxiixdeen Dowlada Dalka Kenya iyo Ergo balaaran oo uu horkacayay Madaxwayne ku xigeenka dalka Iran Maxamed Reza Raximi oo 2-dii maalmood ee ugu danbaysay Kenya ku sugnaa.
Sida ku cad heshiiskani ay wada gaareen labada dowladood ee Iran iyo Kenya kulan looga arinsanayo qatarada argagixisada ee ku wajahan Kenya ayaa lagu qaban doonaa magaalada Tehran ee xarunta u ah Dalka Iran ka hor Bisha September ee isla sanadkaan.
Madaxwayne ku xigeenka dalka Iran Mr Maxamed Reza Raxiimi ayaa sheegay in qatarada argagixiso ee soo wajahaya shacabka iyo Guud ahaan Kenya ay tahay mid ka dhalatay xasilooni darida ka jirta dalka Soomaaliya ee Dariska la ah .
Kulankani lagu wado in lagu qabto magaalada Tehran ee xarunta dalka Iran ayaa waxa ka soo qayb galaya Ergo ka kala socota dowlada Iran iyo Kenya iyo wakiilo ka socda dowlada KMG ee Soomaaliya iyowaliba kuwa kale oo iyana ka socda Igad.
Mr Reza Raximi ayaa walaac ka muujiyay xasilooni darada Soomaaliya oo uu sheegay in ay saamayn ku yeelatay guud ahaan amaanka gobolka Bariga Africa.